सांगली – सांगलीत पोलीस कोठडीत झालेल्या मृत्यूप्रकरणाच्या आरोपींना अटक करण्यात आली असून विशेष पोलीस महानिरीक्षक विश्वास नांगरे-पाटील आणि सांगलीचे पोलीस अधीक्षक दत्तात्रय शिंदे यांचीही या प्रकरणी चौकशी करण्यात येणार असल्याची माहिती गृहराज्यमंत्री दीपक केसरकर यांनी दिली आहे. या प्रकरणात जर ते दोषी आढळले तर त्यांच्यावर देखील निश्चित कारवाई करू, असेही त्यांनी स्पष्ट केले.
विश्वास नांगरे-पाटील आणि दत्तात्रय शिंदे यांच्या अनिकेत कोथळे मृत्यूप्रकरणी बदली आणि राजीनाम्याची मागणी होत आहे. शिवसेनेने याप्रश्नी जोरदार आंदोलन केले होते. केसरकर यांनी त्यावर बोलताना या दोघांचीही चौकशी करणार असल्याचे स्पष्ट केले. हा खटला सर्व पक्षांतील नेत्यांनी, पदाधिकाऱ्यांनी मागणी केल्याप्रमाणे द्रुतगती न्यायालयात चालवला जाणार असल्याचे त्यांनी यावेळी नमूद केले.
गृहराज्यमंत्री दीपक केसरकर यांच्याकडे कोथळे याच्या कुटुंबीयांनी सीबीआयकडे पोलीस यंत्रणेवर विश्वासच उरलेला नसल्याने कोठडीत करण्यात आलेल्या अनिकेतच्या हत्येचा तपास सोपविला जावा, अशी मागणी केली. अनिकेतच्या हत्येला जबाबदार असलेल्या वरिष्ठ अधिकाऱ्यासह अन्य दोषींवर कारवाई झाली नाही तर कुटुंब पोलीस ठाण्यासमोर आत्मदहन करेल, असा इशाराही त्यांनी दिला.
Post a Comment