कोल्हापूर- कारगिल सीमेवर सैन्यदलाच्या दारुगोळ्याची वाहतूक करणाऱ्या लष्करी वाहनाचे टायर फुटून झालेल्या अपघातात कोल्हापूर जिल्ह्यातील भुदरगड तालुक्याच्या बेगवडे येथील मेजर प्रवीण येलकर यांचा मृत्यू झाला. प्रवीण येलकर यांचे कुटुंब आजरा येथे राहाते. येलकर यांच्या निधनाने भुदरगड तालुक्यावर शोककळा पसरली आहे.
उद्या (शुक्रवारी) आजरा येथील भैरवनाथ हायस्कूलच्या पटांगणावर दुपारी दोनच्या सुमारास त्यांच्यावर लष्करी इतमामात अंत्यसंस्कार करण्यात येणार आहेत.
लष्करी अधिकाऱ्यांनी भुदरगड तहसिलदारांना दिलेल्या माहितीनुसार, लडाखहून लष्करी वाहनातून कारगिल सीमेकडे दारुगोळा वाहून नेला जात होता. यावेळी या लष्करी वाहनाचे एक टायर फुटल्याने वाहन उलटले आणि भीषण अपघात झाला. वाहनातील दारूगोळ्याच्या मोठया पेट्या येलकर यांच्या अंगावर पडल्या. त्याखाली दबून त्यांचा मृत्यू झाला.
येलकरांचे पार्थिव आधी मूळगाव बेगवडे येथे आणले जाणार आहे. येलकर यांच्या पश्चात आई-वडील, लहान भाऊ, पत्नी व सात वर्षांची मुलगी असा परिवार आहे.
Post a Comment